المهاجر


حزين عليكي لما سبتك..والدموع ما بين ايديكي
لما شوفتك قاعدة تبكي..والدموع جارية في عينيكي
بس اعمل ايه فلوس مفيش..لازم اجيب حق الرغيف
حتى الرغيف مش في بلدك..طب قوليلي ازاي اعيش
أعيشها سائل كل واحد..اوهم نفسي بالتفائل
أكون عيل مع أني عائل..اعيش جماد مع اني كائن
سألوني يا اما وانا في الغربه..أزاي تعيشها وسط تربه
عايشها عايش متعايش..زي ملك في وسط عزبة
آه ملوك لكن بنشحت..الأمير عايش صعلوك
ابن أمير ومنين جابوك..على باب جامع هناك لاقوك
حتى اللي وافقوا على المعيشة..قالولك خاين وسط عيشة
خاين لمين؟خاين لأيه؟..لبس الملوك عملتوه خيشه
أعيشها راضي ع.اللي فيها..شخص عادي سجله فاضي
غير من كلمة واحدة بس..مواطن على موته ماضي
راضي بموتك وبهلاكك..إمضي ابصم بيع حياتك
طب وليه ما انا اسافر..وانت عادي موت جنابك
غريب وآه الغربة صعبة..لكن شايف هناك حياة
لو عشتها راضي بمربى..أرجع هنا ملك لها
سامحيني يا اما على السفر..ومتسمعيش كل الغجر
اللي قالولك إني خاين..فاقد لمعنى الوطن
ما انا في الوصول م.الغربة يا اما..بكون ملك في وسط دول
بشوف منافسة على المقابلة..كله ليا يكون مذلول
دا مش غرور الغربة يا اما..لكن شوفتك حزينة لما
قالولك ان ابنك دا خاين..أكيد لكل كلمة فاهمه
أكيد عارفه معنى اني سبتك..بالدموع لي كنتي عازفة
أكيد م.الغربة كنتي خايفة..بس اعمل ايه ما انتي شايفة
حزين عليكي لما سبتك..والدموع ما بين ايديكي
لما شوفتك قاعدة تبكي..والدموع جارية في عينيكي


تأليف: أحمد محيسين