فستاني كفني

فستاني كفني


أهلي جوزوني إنسان مابحبهوش..تحت دافع الفلوس
تحت دافع اللي دافع..أكتر بيها يفوز
ضربوني بالمدافع..لما صبوا الكؤوس
شرباتي كان من دمي..ودمي اتباع بفلوس

قالوا دي ساكته راضيه..وسكاتي سبب هلاكي
لما قالوا دي بنت هاديه..اليوم هو مُناكي

نزلت الدمعه مني..يمكن على صغر سني
دي مش دموع الفرحة..أرجوكوا ابعدوا عني

ياللي خدتوا سكاتي موافقة..ياللي عملتوا موتي زفة
فستاني دا هو كفني..وقبري هو الشقة

وفـ يوم زفتي صحباتي..شاركوا في زفة مماتي
اللي رقصت واللي غنت..قالوا لعبت معاكي

ايوا لعبت معايا..وطلعت انا الخسرانه
مش هى دي الحكاية..الحكاية في الخيانة

خيانة أهلي ليا..لما قالوا الستر ليكي
وكنت انا الضحية..لما قال إيدك في إيدي

هاوصلك لعريسك..هايكون شريك حياتك
يقصد ملاك الموت..جاي طالب مماتك

أهلي جوزوني إنسان مابحبهوش..تحت دافع الفلوس
تحت دافع اللي دافع..أكتر بيها يفوز
ضربوني بالمدافع..لما صبوا الكؤوس
شرباتي كان من دمي..ودمي اتباع بفلوس

لما امي زغرطت..ياريتها صوتت
فرحانة فيا يا اما؟..ولا الدنيا ضلمت؟

ولا اهلك جوزوكي..زي مابتجوزوني؟
يارب يكون كابوس..ومنه يفوقوني

وصحيت على صوت غريب..صوت مني كان قريب
بيقولي حضريلي..فطار ولبس جديد

صحيت مفزوعة من نومي..قاللي يابنتي أهدي
عندك حق في كلامك..حفيدتك وأنت جدي

قولي اشتريتني بكام..وأعتقني بالمجان
هاكون خدامة عندك..بس سبني انام

أهلي جوزوني..إنسان فاكرني جارية
أكون مطيعة ليه..مـعملش حاجه تانية

أعملي دي و دي..أقعدي معايا كلي
واقفة مكانك ليه؟..خدي اللبس أغسلية

أهلي جوزوني إنسان مابحبهوش..تحت دافع الفلوس
تحت دافع اللي دافع..أكتر بيها يفوز
ضربوني بالمدافع..لما صبوا الكؤوس
شرباتي كان من دمي..ودمي اتباع بفلوس

الغلطة مش في أهلي..كل الغلط في عاداتهم
قانون الجهل دايماً..بيورثوه لأولادهم

جوز بنتك لعجوز..يكون مليان فلوس
سنتين يموت بعديها..بنتك بالورث تفوز

ماشيين على خط واحد..كل عقولكوا راحت
دا اللي ماتت في زمانكوا..أكيد منكم إرتاحت

ماشيين على عاداتكم..والجهل حكم عقولكم
بتاخدوا اسوء مافيها..والصح مش في بالكم

زمنا مش زمانكوا..وزمانكوا مش زمنا
عاداتنا مش عاداتكم..وعاداتكم مش عاداتنا

هـيكون صح كلامكم..لما أكون راضيه بيه
مش تغصبوني على واحد..تحت دافع الجنيه

تحت دافع اللي دافع..أكتر هايشتريها
مش مهم تكون موافقة..المهم مين شاريها؟

تأليف: أحمد محيسين